黑色警示 旅遊保險有得保?!

by 保險線人 3. September 2011 04:34

今早入到芳姐的茶餐廳時,她馬上煞有介事地走過來。

「早晨呀,森哥,今早想食邊款早餐呀,我幫你點。」芳姐既親切又緊張地問我。

「嘩,要勞動老闆娘同我落單,真係受寵若驚喎!唔通芳姐有事相求?」

「哈,森哥,你真係醒目,唔好講咁多,我先幫你落單,叫咗嘢再講!」芳姐確實很心急,我只好悉隨尊便。

「好啦,我就叫個A餐啦,飲熱奶茶!」

「好,馬上嚟!」芳姐一面落單,一面跑去交單,然後又撲過來。

「喂,森哥,想請教你一樣嘢!我聽講保安局舊年年底實施咗個『旅遊警示』既機制,到底係點既一回事?最重要係,對旅遊保險有冇影響呀?」聽到「旅遊警示」這幾個字,一向好奇的阿蘇也靠過來,豎起耳朶聽。

「咦,點解妳咁緊張呀,妳有朋友想去泰國咩?」我隨口說說,但原來開口中。

「嘩,真利害,一講就中!係呀,我細佬尋日出差去咗曼谷,佢出發前托我問吓,佢份旅遊保險到底有冇得保喎,因為佢話,舊年保安局有個新政策,唔知會點樣影響旅遊保險?」

「芳姐,蘇哥,唔係我特別醒目,稍為有留意時事既都知,泰國近來又有反政府示威,香港政府已經提高咗曼谷既『旅遊警示』,由黃色變為紅色!」。

「係呢,森哥,到底紅同黃既分別係點呀?!」阿蘇雖然好奇,但也算得上好學。

「哦,係咁既,保安局為咗提供更全面既旅遊資訊俾香港市民,喺舊年10月20日推行一套『旅遊警示』制度,主要分為黃、紅、黑三個級別。黃色表示受影響地區或國家有受到威脅既跡象,市民去到當地要提高警惕;至於紅色就表示,受影響地區或國家受到更廣泛或全國性既威脅,市民應該調整行程,如非必要(如旅遊),應該避免前赴該國家或地區;至於黑色警示,即係表示受影響既地區或國家正受到嚴重威脅,市民不應該前赴當地!」

「咦,依家泰國好似係紅色喎,咁旅遊保險係咪冇得保架喇!?」芳姐馬上聯想到旅遊保險。

「咁又唔係,據我了解,呢套『旅遊警示』既制度,對旅遊保險既影響好有限,甚至可以講,部分旅遊保險既保障仲大咗!」阿蘇露出詫異的神情,好像不信我的講法。

「阿蘇,你聽我講。從旅遊保險既角度,我諗要分兩類,一類係買咗全年保障既,另一類係逐次買既。首先,買全年旅遊保險果種,暫時大部分保險公司都冇因應呢個『旅遊警示』制度而修改保障條款,所以,佢地都會沿用本來既『不保事項』去限制風險,例如暴動,戰爭等,呢啲本來就唔保既。如果因為其他受保原因而招致損傷或損失則繼續受保!至於單次買既旅遊保險,我知道,有啲保險公司反而仲增加咗保障,例如買咗保險之後,保安局提高咗『旅遊警示』,如果客人被迫取消行程,仲會有得賠添。總之,你要詳細了解每份保單既內容。不如咁啦,為人為到底,你叫你細佬電郵佢份保單我睇啦!」聽到我這樣說,芳姐有點釋懷了!